|
352 Enna villa de Borges una cibdat estranna,
cuntió en essi tiempo una buena hazanna;
sonada es en Francia, sí faz en Alemanna,
bien es de los miraclos semejant e calanna.
353 Un monge la escripso, omne bien verdadero,
de Sant Miguel era de la Clusa claustero,
era en essi tiempo en Borges ostalero,
Peidro era su nomne, fo ende bien certero.
354 Tenié en essa villa, ca era menester,
un clérigo escuela de cantar e leer;
tenié muchos crïados a letras aprender,
fijos de bonos omnes que querién más valer.
355 Venié un judezno, natural del logar,
por savor de los ninnos, por con ellos jogar;
acogiénlo los otros, no li fazién pesar,
avién con él todos savor de deportar.
356 En el día de Pascua, domingo grand mannana,
quando van Corpus Dómini prender la yent christiana,
priso’l al judezno de comulgar grand gana,
comulgó con los otros el cordero sin lana.
357 Mientre que comulgavan a muy grand presura
el ninno judezno alzó la catadura,
vío sobre’l altar una bella figura,
una fermosa duenna con genta creatura.
358 Vío que esta duenna que posada estava,
a grandes e a chicos ella los comulgava;
pagóse d’ella mucho, quando más la catava
de la su fermosura más se enamorava.
359 Issió de la eglesia alegre e pagado,
fue luego a su casa como era vezado,
menazólo el padre porque avié tardado,
que mereciente era de seer fostigado.
360 «Padre -dixo el ninno- non vos negaré nada,
ca con los christianiellos fui grand madurgada;
con ellos odí missa ricamientre cantada,
e comulgué con ellos de la ostia sagrada.»
361 Pesóli esto mucho al malaventurado,
como si lo toviesse muerto o degollado;
non sabié con grand ira qué fer el dïablado,
fazié figuras malas como demonïado.
362 Avié dentro en casa esti can traïdor
un forno grand e fiero que fazié grand pavor;
fízolo encender el locco peccador,
de guisa que echava sovejo grand calor.
363 Priso esti ninnuelo el falso descreído,
asín como estava, calzado e vestido,
dio con él en el fuego bravament encendido:
¡mal venga a tal padre que tal faze a fijo!
364 Metió la madre vozes e grandes carpellidas,
tenié con sus onçejas las massiellas rompidas,
ovo muchas de yentes en un rato venidas,
de tan fiera quessa estavan estordidas.
365 El fuego porque bravo fue de grand cosiment,
no li nuzió nin punto, mostróli buen talent;
el ninnuelo del fuego estorció bien gent,
fizo un grand miraclo el Rey omnipotent.
366 Yazié en paz el ninno en media la fornaz,
en brazos de su madre non yazrié más en paz,
non preciava el fuego más que a un rapaz,
ca’l fazié la Gloriosa companna e solaz.
367 Issió de la foguera sin toda lissïón,
non sintió calentura más que otra sazón;
non priso nulla tacha, nulla tribulación,
ca pusiera en elli Dios la su bendición.
368 Preguntáronli todos, judíos e christianos
cómo podió venzer fuegos tan sobranzanos,
quando él non mandava los piedes ni las manos
quí lo cabtenié entro, fiziésselos certanos.
369 Recudiólis el ninno palavra sennalada:
«La duenna que estava enna siella orada
con su fijo en brazos sobre’l altar posada,
éssa me defendié que non sintié nada.»
370 Entendieron que era Sancta María ésta,
que lo defendió ella de tan fiera tempesta;
cantaron grandes laudes, fizieron rica festa,
metieron esti miraclo entre la otra gesta.
371 Prisieron al judío, al falsso desleal,
al que a su fijuelo fiziera tan grand mal,
legáronli las manos con un fuerte dogal,
dieron con elli entro en el fuego cabdal.
372 Quanto contarié omne poccos de pipïones,
en tanto fo tornado cenisa e carbones,
non dizién por su alma salmos nin oraciones,
mas dizién denosteos e grandes maldiziones.
373 Diziénli mal oficio, faciénli mala ofrenda,
dizién por «Pater noster», «Qual fizo, atal prenda».
De la comunicanda Domni Dios nos defenda,
pora’l dïablo sea tan maleíta renda.
374 Tal es Sancta María que es de gracia plena,
por servicio da Gloria, por deservicio pena;
a los bonos da trigo, a los malos avena,
los unos van en Gloria, los otros en cadena.
375 Qui servicio li faze es de buena ventura,
qui’l fizo deservicio nació en ora dura,
los unos ganan gracia e los otros rencura,
a bonos e a malos so fecho los mestura.
376 Los que tuerto li tienen o que la desirvieron,
d’ella mercet ganaron si bien gela pidieron;
nunca repoyó ella a los que la quisieron,
ni lis dio en refierta el mal que li fizieron.
377 Por provar esta cosa que dicha vos avemos,
digamos un exiemplo fermoso que leemos;
quando fuere contado mejor lo creeremos,
de buscarli pesar más nos aguardaremos.
| 
